حکومت نوجوانوں کو تعلیمی سہولیات فراہم کرنے کے لیے پرعزم ہے، قادر بخش پرکانی

خضدا(خ ن)کمشنر خضدار ڈویژن قادر بخش پرکانی اور ڈپٹی کمشنر خضدار عبدالرزاق ساسولی نے آج شہید عاشق عثمان لائبریری کا تفصیلی دورہ کیا۔ اس موقع پر انہوں نے لائبریری کی مجموعی کارکردگی، سہولیات اور انتظامات کا جائزہ لیا۔دورے کے دوران کمشنر اور ڈپٹی کمشنر کو لائبریری انتظامیہ کی جانب سے بریفنگ دی گئی۔ بتایا گیا کہ لائبریری کا بنیادی مقصد خضدار کے طلبہ اور نوجوانوں کو پرسکون تعلیمی ماحول فراہم کرنا ہے تاکہ وہ مقابلے کے امتحانات اور تعلیمی سرگرمیوں کے لیے بہتر تیاری کر سکیں۔افسران نے لائبریری کے قیام اور اس کی تزئین و آرائش کو سراہا۔ انہوں نے کہا کہ اس طرح کے تعلیمی مراکز ضلع کے نوجوانوں کے لیے علم و تحقیق کا اہم ذریعہ ہیں۔ لائبریری کی عمارت، ریڈنگ ہال اور بیٹھنے کی سہولیات کو دیکھ کر انہوں نے اطمینان کا اظہار کیا۔لائبریری انتظامیہ نے بتایا کہ بی ایم ای کی جانب سے لائبریری کو جدید سولر سسٹم سے آراستہ کیا گیا ہے۔ اس سسٹم کی تنصیب سے اب لائبریری میں لوڈشیڈنگ کے دوران بھی بجلی کی فراہمی ممکن ہو گئی ہے اور طلبہ کو بلا تعطل مطالعے کا موقع مل رہا ہے۔سولر سسٹم کے حوالے سے بتایا گیا کہ اس سے لائبریری کی روشنی، پنکھوں اور کمپیوٹر سسٹم کو مسلسل بجلی مل رہی ہے۔ اس اقدام سے نہ صرف بجلی کے اخراجات میں کمی آئی ہے بلکہ ماحول دوست توانائی کے استعمال کو بھی فروغ ملا ہے۔کمشنر خضدار قادر بخش پرکانی نے کہا کہ حکومت نوجوانوں کو تعلیمی سہولیات فراہم کرنے کے لیے پرعزم ہے اور اس طرح کے منصوبوں کو مزید وسعت دی جائے گی۔ڈپٹی کمشنر خضدار عبدالرزاق ساسولی نے لائبریری میں موجود کتابوں اور دیگر وسائل کا معائنہ کیا۔ انہوں نے ہدایت کی کہ لائبریری میں نصابی کتب کے ساتھ مقابلے کے امتحانات، جنرل نالج اور تحقیق سے متعلق جدید کتابیں بھی شامل کی جائیں تاکہ طلبہ کو زیادہ سے زیادہ فائدہ حاصل ہو۔انتظامیہ کے مطابق تزئین و آرائش کے بعد لائبریری میں آنے والے طلبہ کی تعداد میں اضافہ ہوا ہے۔ روزانہ کی بنیاد پرطالب علم یہاں آ کر پڑھائی کرتے ہیں اور تعلیمی سرگرمیوں میں حصہ لیتے ہیں۔