گووندا اور سنیتا کے درمیان طلاق کی افواہیں، بیٹی ٹینا آہوجہ نے ذہنی پریشانی کا اظہار کردیا

بالی ووڈ اداکار گووندا اور ان کی اہلیہ سنیتا آہوجا کی بیٹی ٹینا آہوجا نے کہا ہے کہ والدین کی ازدواجی زندگی بارے خبریں متاثر کرتی ہیں، تاہم اب انہیں نظرانداز کرنا سیکھ چکی ہوں۔ایک انٹرویو میں 36سالہ ٹینا آہوجا نے کہا کہ بچپن سے ہی اپنے والدین کے حوالے سے مختلف قیاس آرائیاں اور خبریں سنتی آ رہی ہوں،ان میں سے زیادہ تر باتیں بے بنیاد ہوتی ہیں یا انہیں بڑھا چڑھا کر پیش کیا جاتا ہے، جس سے انہیں ذہنی پریشانی کا سامنا کرنا پڑتا ہے۔انہوں نے کہا کہ اب وہ ایسی افواہوں پر وضاحت دینے کے بجائے خاموش رہنے کو ترجیح دیتی ہیں، کیونکہ یہ سب کچھ وہ اپنی زندگی کے ابتدائی دور سے دیکھتی آ رہی ہیں۔گووندا کی صاحبزادی نے بتایا کہ پہلے اس نوعیت کی خبریں رسائل اور اخبارات تک محدود تھیں، پھر انٹرنیٹ کا دور آیا اور اب یہی چیزیں انسٹاگرام، یوٹیوب اور دیگر سوشل میڈیا پلیٹ فارمز تک پھیل چکی ہیں۔ٹینا آہوجا نے کہاکہ شوبز کی دنیا میں ہر دور میں میڈیا کی جانب سے نئی کہانیاں سامنے آتی رہی ہیں، اس لیے عوامی زندگی سے وابستہ افراد کو مضبوط اعصاب کا مظاہرہ کرنا پڑتا ہے۔انہوں نے کہا کہ کسی بھی فنکار یا اس کے خاندان کےلئے مسلسل قیاس آرائیوں کا سامنا آسان نہیں ہوتا، تاہم وقت کے ساتھ انسان ان حالات سے نمٹنا سیکھ لیتا ہے۔